رواية نادرة قلبي بقلم دعاء أحمد..الجزء العاشر.

انك كنت بتمسكي ايدي في ورقه تانية وعلمتيني ازاي اكتب الحروف وانا قلدتها تاني في الكراسة قالتلي شاطرة وادتني شكولاته
نادرة بسعادة وحماس غريب
شطورة. عارفة يا بحر وانا صغيرة مكنتش بعرف اكتب وكنت بعيط علشان مكنتش بعرف اعمل الواجب بتاعي بس انتي هتكوني شاطرة مش كدة
بحر بابتسامه
لو انتي فضلتي تعلميني هبقي اشطر واحدة في الفصل.
نادرة ابتسمت بود وهي بتبص لها لحد ما خلصت وحطت التورته في التلاجة بعد ما زينتها نضفت المطبخ وخرجت مع بحر اللي طلعت بسرعة تتفرج على التليفزيون نادرة كانت بتتفرج عليها وهي بتفتكر نفسها وهي صغيرة وأنها كانت شقية اوي يمكن مش شبه بحر في هدوئها لكن جواهم الاتنين احساس واحد بالفقد انهم فقدوا شي مهم جدا عليهم. اتنهدت ودخلت اوضتها وبعد دقايق ندت لبحر
نادرة بصوت عالي 
اطفي التليفزيون يا بحر وتعالي عايزاكي
بحر حاضر
نادرة كانت فاتحة باب اوضتها وبتظبط الدولاب بحر خبطت على الباب ودخلت. نادرة بصتلها بحب وابتسمت
تعالي يا بحر.
بحر وهي بتقعد على الكرسي هو في حاجة
نادرة طلعت علبة من الدولاب وراحت ناحيتها قعدت أدامها على الأرض ومدت ايدها تديها العلبه
بحر ايه دا
نادرة هدية ليكي
بحر ليا أنا
نادرة افتحيه
بحر عضت على شفايفها بتوتر وفتحت العلبة. بقيت بصلها وهي مستغرب ومبسوطة
الفستان الحلو دا علشان أنا
نادرة بابتسامه وهي بتمسك ايدها
عجبك .
بحر بسعادة كبيرة
دا حلو اوي يا نادرة حلو اوي ينفع البسه النهاردة.
نادرة
زي ما تحبي وهعملك تسريحه جميلة
بحر قامت وقفت قصدها وتلقائية طبعت بوسه على خد نادرة
أنا بحبك اوي يا نادرة على فكرة. بس مش علشان الفستان ولا علشان التسريحة اقولك الحقيقة أنا كنت بخاف اوي وانا نايمة في الشارع وكنت بزعل لما حد يزعقلي ويقول اني شحاته وكنت بشوف العيال مع اهلهم ويقولوا أن عندهم ماما وبابا بس أنا كمان بقا عندي ماما حلوة زيك وبابا طيب زي حسن. وبقا عندي أوضة جميلة وسرير حلو وبقا عندي حاجات كتير حلوة. أنا بفرح لما تفرحوا ولما بسمع حسن بيدعي انه ربنا يحفظنا ويحفظ النونو بدعي ربنا أنا كمان انه يحفظكم علشان أنتم نفسكم فيه وهتكونوا فرحنين لما يجي وانا نفسي دايما تكونوا فرحنين.
نادرة عيونها كانت بتلمع بالدموع بحر حضنتها وفضلت قاعدة جانبها
بحر 
خلاص متعيطيش بقا والله هزعل منك اني مش بحب الدموع
نادرة مسحت دموعها وباست راسها بحب
خالص مش هعيط وانتي كمان توعديني تبطلي تفكري في اللي فات وفي الشارع والناس الوحشه دا بيتك وانا وحسن معاكي طول ما فينا النفس ماشي يا ست بحر
بحر ماشي.
نادرة 
تعالي بقا نتوضي ونصلي العصر سوا
نادرة اخدتها وعلمتها ازاي تتوضي وصلوا سوا ونادرة بتعلمها كل خطوة
بعد ساعة تقريبا نادرة وبحر كانوا بيزينوا البيت ب شي كل هادي ومتناسق وبسيط جدا
الساعة تمانية بليل بحر كانت نايمة بعمق نادرة بصتلها باستغراب انها نامت لكن اخدتها اوضتها تنام. خرجت وراحت اوضتها تاخد شاور
حسن وصل تحت البيت ركن الموتسكل بتاعه وطلع لكن استغرب الهدوء شغل نور الشقة وبص للمكان باستغراب الزينة وكل حاجه وهو مش فاكر أن دا يوم عيد ميلاده اصلا لان عمره ما احتفل بيه
حسن بصوت عالي نادرة. يا بحر. نادرة
راح لاوضة بحر لقاها نايمة سابها وراح اوضته. فتح الباب وابتسم بتعجب وهو شايف التورتة اللي محطوطة على التربيزة والنور الهادي. نادرة. ابتسمت بحب وهي بتبص له حسن كان واقف منبهر من جمالها وكأنه أول مرة يشوفها لكن يمكن لأنها مختلفة المرة دي كانت لابسه فستان اسود طويل شيك جدا وشعرها الناعم منسدل باناقه على ضهرها عيونها ولمعتها كل حاجة فيها مميزة نادرة بدلال وهي بتلف ايدها حوالين رقبته
كل سنة وانت طيب يا أبو على.
حسن بابتسامه وسعادة
ايه الجمال دا كله هو أنا دخلت شقة غلط وانا مش واخد بالي.
نادرة بزعل 
هو أنت جيت قبل كدا وكان شكلي وحش لا سمح الله ولا أنا معجبش
حسن 
دا انتي تعجبي الباشا يا مربي حياتي انتي. بس بمناسبة ايه دا كله
نادرة 
عيد ميلادك يا حسن في ايه
حسن 
هو النهاردة! دا أنا كنت ناسي اصلا
نادرة بتغنج 
بس أنا بقا مش نسيت كل سنه وانت حبيب قلبي يا حسن
حسن 
والله أنا هيجرالي حاجه منك في يوم من الأيام. بس مقبولة منك
نادرة 
ايه مقبولة منك دي يا حسن قولي كلام حلو متحسسنيش اني عامر صاحبك في ايه يا جدع
حسن 
خالص خالص في ايه دا انتي بتقلبي في ثانية
نادرة بدلال طفولي 
عايزاه اسمع كلام حلو
حسن 
مش عارف ليه بحس اني مع بنتي مش مراتي يا نادرة.
نادرة 
يووووه بقا يا حسن أنت بتبوظ اللحظة وانا اشتغلت كتير عليها
حسن 
طب خالص متزعليش يا ستي حقك عليا. كل سنة وانتي طيبة
نادرة 
وانت بالصحة والسلامة. وكملت لنفسها بغيظ
دا فكرني امه دا ولا ايه.
حسن 
طب وطي صوتك بس الأول علشان عالي وبعدين انتي مش عجبك كلامي
نادرة 
امشي يا حسن ادخل خد دش وانا هنام تصبح على خير أنا غلطت لما فكرت نحتفل سوا