رائعة منال جميعي الجزء الثالث

يا شيرين
ترقرقت الدموع في مقلتيها وقالت بأسى..ياه اخيرا لقيت حد يحبني عشان أنا شيرين وبس مش عشان أي حاجة تانية صدقني ياعصام انا مش عايزة اكتر من كده عشان كده متمسكة بيك عشان بتحبني لشخصي وبس وانا يعني اخدت إيه من الفلوس غير انها خسرتني أبويا وأخويا
عصام بحب..اوعدك يا شيرين إني اكون ليكي أب وأخ وزوج وحبيب وصديق وكل اللي بتتمنيه أنا بس عايزك تحدديلي معاد مع خالتك عشان اجيب أهلي وآجي اطلب إيدك منها وحابقى اكلمك فالتليفون عشان اعرف منك المعاد معلش أنا مضطر اسيبك دلوقتي عشان الحق ارجع القاهرة مش عايزة مني أي حاجة قبل ما امشي
شيرين بإبتسامة..لما توصل طمني عليك مع السلامه
عصام..الله يسلمك اشوف وشك
وبالفعل تمت خطبة شيرين وعصام بعدها في حضور كل من يمنى وأسماء وتم الإتفاق على أن يكون عقد القران قبل حفل الزفاف الذي سيتم تحديد موعده عندما ينتهي عصام من إيجاد الشقة وفرشها
جلسا معا أمام الطبيبة وقد بدت خيبة الأمل واضحة علي وجهيهما فقد انتهت الستة اشهر دون جديد رمقتها الطبيبة بنظرة مشفقة قبل ان تقول..طبعا انتي عارفة انه محصلش حمل وده نتيجة ان إستجابتك للعلاج ضعيفة جدا
عمرو بضيق..والمفروض نعمل إيه دلوقتى يا دكتورة 
الطبيبة..والله لو حضراتكم حابين اننا نمد فترة العلاج على أمل ان الإستجابة اللي مستنيينها تحصل مافيش مشكلة لكن لو حابين تكسبوا وقت انا ممكن اكتب لحضراتكم اسم وعنوان مركز متخصص في عمليات الحقن المجهري وبعد العملية ممكن نتابع مع بعض والقرار ليكم فالنهاية
أسرع عمرو قائلا بحزم..احنا موافقين على موضوع العملية مافيش داعي نضيع وقت اكتر من كده
أؤمات الطبيبة برأسها قائلة..وهو كذلك انا حاكتب لحضراتكم بيانات المركز وهناك هما حيفهموكم على كل حاجة وياريت تحاولوا ماتتأخروش لأن التحضير للعملية بياخد وقت وحستناكم بعد العملية ان شاء الله وبالتوفيق ان شاء الله
انصرف عمرو ويمنى إلي منزلهم كان الصمت هو صديقهم الصدوق في الأثناء يبدو ان عمرو لم يعد يجد كلمات يواسيها بها أو ربما هو نفسه يحتاج إلى من يواسيه اما يمنى فقد شعرت ان الموقف اكبر من أي كلمات تقال فالتزمت الصمت ورغم ضيقها من قراره الذي اتخذه دون إستشارتها وكأن الأمر يخصه وحده ولكنه على ما يبدو قد صار الحل الوحيد الذي لا بديل عنه وبالفعل بدأ عمرو ويمنى يترددان على المركز للتحضير للعملية الأمر الذي استغرق بعض الوقت قبل ان يتم تحديد موعد إجراؤها قرر يحيى تأجيل سفره حتى يطمئن على يمنى أولا وفي اليوم الذي تقرر فيه عودة يمنى لمنزلها بعد إجراء العملية اعطاها طبيب المركز بعض التعليمات قائلا..اهم حاجة يا مدام يمنى هي الراحة التامة وعدم بذل أي مجهود ويفضل ان حضرتك تعملي التحليل بعد مرور 15 يوم على عملية زرع الأجنة وياريت تحاولي تتمشي كل يوم عشر دقايق عشان تنشطي الدورة الدموية فجسمك يعني تقريبا كده بتوع الحمام والصلاة مش اكتر من كده
استمعت يمنى لتعليمات الطبيب بإنصات وإهتمام شديدين واكدت على إلتزامها بتنفيذها حرفيا
وبالفعل بعد مرور الخمسة عشر يوما قامت بإجراء التحليل الذي حمل لها ولعمرو ذلك النبأ السار الذي يحلم به كل منهما منذ فترة ولكنه الآن صار واقعا ملموسا كانت سعادة الجميع غامرة بهذا الحمل واكثرهم بالطبع فريدة التي ظلت تحصي الأيام حتي يأتي ذلك اليوم الذي تحمل فيه حفيدها بين ايديها
وفي الوقت الذي كان فيه جنين يمنى ينمو بين احشائها كان هناك جنين آخر يستعد ليطلق صرخته الأولي في هذه الحياة سبقتها بالفعل صرخات أمه التي شقت سكون الليل لتوقظ زوجها النائم إلى جوارها الذي استيقظ قائلا في فزع..إيه يا أسماء مالك فيه إيه 
أسماء وهي تئن من الألم..الحقني يا عماد شكلي كده بولد
أخذ عماد يدور حول نفسه فترة جاهلا بكيفية التصرف صړخت فيه أسماء قائلة..انت هتفضل تلف حوالين نفسك كده كتير بسرعة اتصل بالدكتورة ووديني المستشفى وشنطة الهدوم هتلاقيها عندك فالدولاب
عماد وهو يقوم بتبديل ملابسه ..حاضر حاضر انا هكلم الدكتورة وهكلم مامتك وماما عشان يحصلونا علي هناك
وبالفعل اتصل عماد بالطبيبة ثم حمل حقيبة الملابس واسند زوجته إلي السيارة وانطلقا في طريقهما إلى المستشفى
دخل عماد إلى الغرفة التي ترقد بها زوجته بعد خروجها من العمليات وجلس بجوارها على الفراش ثم مسح على شعرها بحنان قائلا..حمد الله على السلامة يا حبيبتي
أسماء بوهن..الله يسلمك يا عماد شوفت البيبي 
عماد بسعادة..ايوه انا لسه جاي من عنده ماشاء الله زي القمر ربنا يباركلنا فيه بس انتي خسړتي الرهان على فكرة
أسماء..ما احنا عارفين من زمان اني خسرته وبقيت انا الأقلية فالبيت وامري لله بس انت ناوي فعلا تسميه آدم 
عماد..إيه مش عاجبك الإسم ده 
هزت رأسها نافية وقالت..لا بالعكس ده اسم جميل آوي
في هذه الأثناء دخل والدا عماد وشقيقته ثم تبعهم والدة أسماء وشقيقتها هنأها الجيع على سلامتها ودعوا الله بأن يجعله ذرية صالحة ويقر اعين والديه به اتصلت يمنى لتهنئ أسماء وتعتذر لعدم قدرتها على المجئ فيما زارتها شيرين لتهنئها وتطمئن عليها
في مطار برج العرب وقف الجميع هذه المرة في وداع يحيى وهو يغادر البلاد متجها إلى انجلترا ليعود حاملا معه شهادة الدكتوراه في الهندسة المعمارية بإستثناء يمنى التي منعتها ظروفها عن المجئ وفؤاد الذي تعلل بإنشغاله ارتفعت الطائرة في الجو وهي تحمل على متنها يحيى محملا بأحلامه وأماله التي يتمنى تحقيقها في بلاد الإنجليز
كعادتها كل صباح منذ بداية الحمل تتوجه إلى منزل ابنتها تطمئن عليها وتقوم بكل شئون المنزل ثم تحضر الطعام لزوج ابنتها الغائب في عمله وتودعها على أمل العودة في الغد صار هذا روتينها اليومي الذي اعتادته في ذلك اليوم وبعد ان فرغت من كافة اعمال المنزل اقتربت من فراش ابنتها قائلة..خلاص يا حبيبتي انا خلصت كل حاجة انا حامشي دلوقتي عشان الحق احضر الغدا لباباكي قبل ما يرجع من الجامعة مش عايزة مني حاجة قبل ما امشي 
يمنى..سلامتك يا حبيبتي ربنا ميحرمنيش منك ابدا يا ماما
نادية..ولا منك يا حبيبتي بس اعملي حسابك انا مش جاية بكرة
يمنى بأسى..ليه بس يا ماما ده انا اتعودت اني اشوفك كل يوم
نادية..اصل انا وابوكي مسافرين بكرة دمنهور عند فؤاد اخوكي ابوكي الولاد وحشوه اوي وفؤاد مش فاضي يجيبهم حنروح نزورهم ونرجع علطول مش هنبات هناك عشان خاطرك ده حتى ابوكي اخد اجازة من الكلية يوم واحد انا حضرتلكم اكل لبكرة كمان ابقي خلي عمرو يسخنه بس وانا هكون عندك بعد بكرة إن شاءالله
يمنى..ماشي يا حبيبتي تروحوا وترجعوا بالسلامة ابقي سلميلي على فؤاد وصفاء وبوسيلي الولاد
احتضنت كل منهما الأخري وكأنها تودعها لأخر مرة غادرت نادية ليعود عمرو بعد قليل كانت يمنى تتململ في فراشها فقد بدأ الشعور بالسأم يتسلل إليها كثيرا في الأونة الأخيرة من طول فترة مكوثها بالفراش دخل عمرو ملقبا السلام ثم اقترب من فراش زوجته وقبل جبينها قائلا..عاملة إيه النهاردة يا حبيبتي 
يمنى بملل..تعبانة اوي
يا عمرو طول النهار مش باعمل حاجة غير إني أنام واقوم من النوم عشان ارجع أنام تاني زهقت زهقت اوي
جلس عمرو بجوارها وامسك يدها قائلا..معلش يا حبيبتي استحملي شوية خلاص هانت فات تلت شهور بحالهم اهم عشان خاطري وخاطر ابننا تعالي على نفسك شوية
يمنى..وانا يعني بإيدي إيه أعمله ما انا لازم آجي على نفسي واستحمل بس يا رب تكمل على خير انا كل ما افتكر ان لسه ست شهور على الحالة دي متتصورش بحس بإيه
عمرو..افتكري كده لما الست سهور يخلصوا وناخد ابننا ولا بنتنا فحضننا ساعتها هنحس بإيه
تنهدت يمنى وقالت في ضجر..ياااه امتى اليوم ده ييجي بس 
يتبع