كفاح زاهية بقلم فاطيمة يوسف
تقعدي معانا شويه يا زاهيه وحشتني قعدتك .
رفعت زاهيه حاجبها باندهاش وردت عليه
_غريبه يا يوسف بقى انت عايز تقعد مع زاهيه ياه مش مصدقه ودني والله .
ابتسم لها بسماجه وقال لها
_زاهية دلوقتي غير زاهيه بتاعت زمان .
ربعت ايديها حوالين صدرها واتكلمت بكل شموخ
_ متهيا لك شكلي هو شكلي ولبسي هو لبسي متغير حاجه بسيطه وطبعي الطيب هو طبعي يا ترى ايه اللي اتغير في وجهه نظرك يا يوسف .
_مين قال كده زاهيه متغيره كليا عن زاهيه اللي انا اتجوزتها وعاشرتها 12 سنه .
رفعت راسها بشموخ وسالته
_ويا ترى ايه اللي متغير في وجهه نظرك يا يوسف عرفني عليه يمكن انا ما اعرفش نفسي .
بدا يجاوبها على سؤالها بالتفصيل
_زاهيه دلوقتي متعلمه ناضجه مثقفه ومش بس كده دي متفوقه قدرت انها تاخد الثانويه بتفوق على المحافظه وكمان ما قصرتش مع ابنها واخذ الابتدائيه بتفوق برده
_غير طبعا انها بقت برنسيسه في لبسها وفي شياكتها وحتى في ذوق البيت اللي انت غيرتيه بعد ده كله مش شايفه ان فيه زاهيه جديده قاعده قدامي .
بصت زهره على المكان من حواليها وردت عليه
_قد كده الحيطان ومظهرها والهدوم وماركتها هي اللي بتدي قيمه للانسان !
انا شكلي هو شكلي وطبعي هو طبعي كل اللي اتغير ان انا بقيت متعلمه وبقى مستوايا الفكري اعلى من مستواك يا يوسف لكن ايام ما كنت جاهله وكنت محوطاك واخده بالي من بيتي وابني وبدوس على كرامتي ما كنتش عاجباك بالرغم من اني ما اتغيرتش .
يوسف شايف قدامه واحده قويه غير اللي عرفها نهائي وصمم على كلامه
كملت مناقشتها معاه
_طبعا التعليم مهم لا غبار على كلامك لكن مش معنى ان احنا نبقى متعلمين اننا نكسر خاطر اللي قدامنا ونحطمه لما يكون النصيب منعه انه يكون منهم والدليل على كلامي انت يا يوسف متعلم ومعاك شهاده عاليه ووظيفه مرموقه وبالرغم من كده ما تعرفش يعني ايه جبر خاطر ما كنتش تعرف يعني ايه تعامل زوجتك بما يرضي الله ما كنتش تعرف يعني ايه بيت واسره واهتمام مع ان جاهلين كثير قوي ما يملكوش الشهاده لكن معيشين زوجاتهم كما الملكات بالظبط عرفت الفرق اللي انا أقصده .
_بصراحه كده يا زاهيه انا عايز نرجع لبعض ونلم شملنا من جديد وابننا يتربى في وسطنا .
رده زاهيه من غير ما تاخد وقت في التفكير
_احنا سايبين بعض بقى لنا تلت سنين اشمعنا جاي دلوقتي !
حاول ياثر عليها لكن هي كانت عند موقفها ومش راضيه تتزحزح عنه ابدا ونهت الحوار ما بينهم
ومرت الايام وزاهيه دخلت كليه سياسه واقتصاد وابنها دخل المرحله الاعداديه وبقت منظمه نفسها وحياتها ابنها بيروح المدرسه وهي بتروح على الجامعه
ومركزه جدا في محاضراتها والكل طبعا كان مستغرب وحكيت لهم قصتها وفي منهم اللي كان عارف قصتها لانهم شافوها في الفيديوهات اللي اتعرضت وبقت مشهوره جدا في الجامعه والدكاتره تقريبا كلهم عارفينها
وبتحاول تثبت اجتهادها وبتضغط على نفسها جدا في مذاكرتها وطبعا ما بتسيبش ابنها بتراجع معاه على طول والحياه مستقره وماشيه وقدرت تخلص السنه الاولى بتقدير امتياز وكانت التالته على الدفعه
وفي السنه الثانيه ليها كانت قاعده في المحاضره بتاعتها دخل دكتور تقريبا عنده 45 سنه وبيديهم المحاضره وهي كانت مش بتبطل اسئله فلفتت انتباهه ليها
وتقريبا كل محاضراته بقى مركز معاها جدا لحد ما قرر يعرف قصتها بدون ما يعرف السبب اللي بيوجهه لكده واستغرب جدا
