ندم العشق.. آلاء محمد

بحبها وعمري ما حبيبت ولا هحب غيرها ..
شوق قامت واخدت ليليان.. يلا يا لي لي عشان نغسل ايدينا ونروح الوقت اتأخر ولازم تنامي ..
فات وقت وكان احمد شايل ليليان اللي نامت فالطريق وداخل البيت وشوق وراه ډخلها اوضه شوق وحطها علي السرير ..
شوق ..هغيرلها هدومها وانام انا كمان عشان تعبانه اوي ..
احمد ابتسم.. ماشي يا قلبي تصبحي علي خير ..
احمد خرج وساب شوق مصدومه فضلت واقفه مكانها شوية وبعدين اتحركت غيرت ل ليليان هدومها وغيرت هي كمان ونامت بتعب .. أما احمد كان قاعد فالصاله سرحان قد ايه احساس الابوة جميل كان فرحان اوي
وليليان ماسكه فيه وبتضحكله وبتكلمه اتمني من جواه ان يكون عنده بنت من شوق تكون شبهها فكل حاجة عنيها ضحكتها طريقه كلامها جنانها وقلبها يكون طيب زيها اتمنى ان القدر يديله فرصه تانيه مع شوق يحاولوا من جديد يصلحوا اخطائهم وعيوبهم هما يستاهلوا ده غير هدومه ونام وهو مبسوط 
عند هناء وحسام كانوا فاوضتهم فبيت مامته وحسام كان نايم
هناء.. تفتكر اللي عملناه صح 
حسام ..اه افتكر احمد وشوق محتاجين يعرفوا ويفهموا ان فيه مسؤوليات ودنيا تانيه خالص هما ميعرفوش عنها حاجة لازم يشوفوا ويعيشوا ويتعلموا كمان لازم يعرفوا ان فيه مشاعر جميلة وأحاسيس قوية فيتاهم ولازم يكملوا عشان يعرفوا يعيشوا اللحظات دي 
هناء.. بس انا قلقانه اوي على ليليان لا ينسوا نفسهم وبيتخانقوا قدامها 
حسام.. انا لو شاكك ف ده مكنتش خلتها عندهم ولا كنت فكرت اسيبهالهم اساسا لكن عارف انهم مستحيل يعملوا حاجة غلط 
هناء ابتسمت..بس قولي انت من امتي وانت خبيث كده يعني تعمل الفيلم ده كله وان مامتك تعبانه فاضطرينا نروحلها ونسيب بنتنا عندهم عشان بس يعرفوا قيمه بعض ويرجعوا 
حسام بغرور.. دي أقل حاجة عندي 
هناء ضحكت.. لا متواضع اوي 
فضلوا يتكلموا ويضحكوا لحد ما ناموا وتاني يوم عند شوق واحمد 
ليليان ..خالتو يا خالتو انا اتاخرت علي الحضانه قومي 
شوق بنوم ..يا ليليان هي الساعه كام 
ليليان.. العقرب الكبير علي سبعه والصغير علي اربعه
شوق قامت بفزع.. يالهووي دا انتي اتاخرتي اوي روحي روحي البسي بسرعه عقبال ما اجهزلك اللانش بوكس 
شوق خرجت بسرعه ودخلت لأحمد اوضته وصحته 
شوق.. احمد احمد اصحي بسرعه 
احمد ..امممم عايزه ايه يا شوق 
شوق.. قوم بسرعه يا احمد الساعه سبعه نص ليليان هتتاخر على الحضانه 
احمد قام بسرعه.. يا نهار ابيض انا هقوم البس حالا 
شوق.. طيب طيب وانا هدخل اعمللها لانش بوكس بتاعها بس انت البس بسرعه 
شوق دخلت المطبخ وبدات تعمل الفطار بسرعه وخفه شوية وكان احمد خلص لبس وليليان كمان خلصت 
ليليان دخلت المطبخ ..خلصتي يا خالتو ..
شوق.. ايوا يا حبيبتي ثواني بس روحي انتي البسي الشوز وانا جايه وراكي 
شوق خلصت وخرجت ونزلت لمستواها ..خدي يا حبيبتي كلي الاكل كله وخلي بالك علي نفسك واوعي تتشاقي 
ليليان ابتسمت ..مرسي يا خالتو يلا يا احمد باي 
احمد.. يلا شوق اقفلي الباب كويس هاا 
احمد وليليان خرجوا وشوق حضرت الفطار لأحمد وحطته علي السفرة ودخلت نامت شوية واحمد رجع لقي الفطار وجنبه ورقه مكتوب فيها..اسفه مقدرتش استناك أما تيجي انا حضرتلك الفطار اللي بتحبه كل ونام وانا اللي هروح اجيب ليليان انهارده من الحضانه 
احمد ابتسم وقعد ياكل وهو مبسوط ان شوق فكرت فيه أكل وفضل يشتغل لحد ما شوق صحيت ..صباح الخير
احمد ابتسم.. صباح القمر نمتي كويس 
شوق.. شوية انا هغير هدومي وانزل اجيب لي لي 
احمد قفل اللاب وبصلها.. لا انا اللي هروح اجيبها اقعدي انتي خلصي شغلك انا عارف ان وراكي شغل كتير شوفت الملف امبارح ..
شوق.. أنا فعلا ورايا شغل كثير معلش يا احمد هتعبك...
احمد.. انتي عبيطه ولا ايه انا بحب ليليان زي ما تكون بنتي بالضبط هروح اجيبها واجيب غدا وانا جاي 
شوق ..لا لا متجيبش غدا انا هعمل غدا ..
احمد.. هتعملي ايه ..
شوق.. هعمل رز وفراخ مشوية روح هاتها يلا وانا هقعد اخلص شغلي وقبل ما توصل بربع دقائق كلمني ابتدي اعمل السلطه ...
احمد خرج وشوق ابتسمت وراحت عملت قهوة