نظرية البيست فريند بقلم شهد محمد
حوض الحمام خاتم فضه تقريبآ حد نسيه فا خدته قبل ما حد يجي وحطيته في شنطتي وخرجت له لقيته حاسب وقال اخلي العزومه مره تانيه و ..
عدا كذا يوم وعلاقتنا بدأت تطور كان جميل شكل وشخصيه بيهتم ب الروايات وخياله واسع زايي لدرجة انه بدأ يدور معايا على أرض زيكولا في خيالنا انها ممكن تكون حقيقه ونروح نعيش هناك سوا.. مجانين زي بعض ما صدقت لقيت حد شبهي حد متهور دماغه طقه رغم انه مدير وليه منصب مهم لكن لما بيكون معايا بيكون شاب مراهق في السابعه عشر من عمره
_تسمح ادخل
_ده انتي جوه وانا بره المكان مكانك اصلآ
_ميرسي بس الروايه اهي زي ما وعدتك
_قرأتيها
_اه تحفه تحفه
_طب خلصتي شغل
_ايوا
_طب يلا بينا
_على فين
_على مكان التعامل فيه مش بالفلوس
ابتسمت وانا بقوله
_امال ب ايه
في لحظات تخيلت انه لقى السرادب وهنروح أرض زيكولا بجد كان في دماغي الف سيناريو طول الطريق ساكته متحمسه للمكان اللي قال عليه لحد ما وصلنا قدام ماك فرع المعادي بصيت ليه وانا بقوله
_فين المكان اللي التعامل فيه مش ب الفلوس
شاور على ماك وهو بيقولي
_اهو ما انا احتليت ماك من أجل روز
_اي حاجه هتطلبيها مش هتكون ب فلوس هتكون ب ضحكه حلوه منك انا وماك انهارده تحت امرك
ضحكت وانا بقوله
_يوسف انا عارفه انك مچنون بس انهارده اتأكدت
_الحق عليا عايز افرحك
_انا بفرح بمجرد ما بكون معاك
_بتأكد من وجودك
_واتأكدتي
_ااه ماانت واقف قدامي اهو
_يعني انا حقيقه
_واحلى حقيقه حصلت في حياتي
ابتسم وكملنا رقص اليوم خلص بعد هزار وضحك وحكايات كتير كتير وصلني ب عربيته لحد البيت وفضلنا بنتكلم شويه لحد ما بص في السما وهو بيقولي
_روز بصي
بصيت للسما كان نجم مميز جميل بعيد عن كل النجوم بيلمع
_لاء ده روز
بصيت ليه بأستغراب كمل وقال
_هو كدا انا سميته كدا
ابتسمت ليه وصورت النجم وصورت إيدي وإيده قدام النجم وسلمت عليه وطلعت البيت
طلعت وانا طايره من الفرحه حساني جميله سعيده تقريبآ دي علامات الحب!
رنيت على سلمى عشان تيجي احكيلها اللي حصل قالت قدامها شويه وجايه غيرت هدومي ونزلت اشتريت حاجات حلوه من السوبر ماركت جبت بيبسي وشيبسي وإندومي ومارشميلو وحاجات كتيره اوي ووقفت عشان أحاسب كان فيه واحده سايبه نضارة الشمس بتاعتها على رف من الرفوف خدتها قبل ما تاخد بالها وحاسبت على الحاجه وطلعت البيت تاني
عدا القليل من الوقت وسلمى كانت جت وطبعآ عشان هي بتتكسف ومش واخده عليا
