ابي بقلم سلوى
وسامعه اصواتهم بره بيتكلموا ومحدش حاسس بيا اكيد فى سبب عشان يعملوا كده طب ايه اللى يخليهم يعملوا حاجه حرام وماترضيش ربنا..
جهزت لان ماعنديش اى خيار تانى وقلت انى هجاريهم فى الموضوع لحد ما الاقى حل عملنا الخطوبه وانا مش طايقه نفسى ولا طايقه حد وفضلت افكر عشان اعرف اخرج من المشكله دى بس شكلهم كانوا مرتبين كل حاجه..
مبروك يا عروسه كتب الكتاب بعد اسبوع والفرح فى نفس اليوم
قال كده بعد ما كل الضيوف مشيوا وماكانش فى غيرى انا وهو وبابارديت بكل برود ماعرفش ازاى
هه فرح مين معلش اصلى مش شايفه عروستك يعنى بعدين انا مش هتجوزك واللى تقدر عليه اعمله
قمت من مكانى عشان ادخل الاوضه لقيت بابا بيشدنى من ايدى ورمانى على الكرسى
بابا لو سمحت مفيش داعى تجيب سيرة أمى فى الموضوع وانا قلت قبل كده وهقولها تانى انا مش هتجوز اخويا مفهوم!!!
دخل هو فى الموضوع واتكلم
بقولك ايه مش كل شويه اخوكى وزفت على دماغك قلنا مفيش الكلام ده
لا فى فى يا ابن عمى وانت عارف كويس انك اخويا ولا تحب اشرحلك
طيب هفهمك لما انا اتولدت كانت والدتى مريضه فماكانتش تقدر تاخد بالها منى فبالتالى عشان مامتك كانت كويسه اقترحت عليها تاخدنى لما اجوع وتاخد بالها منى يعنى احنا اخوات شفت بقى
لقيته بيجز على سنانه جامد وبدأ يقرب منى
خبط بايديه على الباب
انا اتنفضت مكانى من الخضه وماحستش بنفسى غير وانا بجرى من قدامه ودخلت الاوضه بس سمعته وهو بيتكلم مع بابا
بص بقى يا عمى بنتك شكلها مش هتجيبها البر انت تفضل سايبها زى الحيوانات فى الاوضه زى ماكنت بتعمل اليومين اللى فاتواما الفلوس اللى اتفقنا عليها انا حولتلك نصهم فى حسابك وشغلك ماشى كويس وكل حاجه هتكمل بعد الجواز ولو ماحصلش اقسم بالله كل حاجه هتبوظ وهتيجى على دماغك..
انتى مش ناويه تجيبيها البر ولا اى ايييه مفيش حد يشكمك
حضرتك بتتكلم ازاى يا بابا هى حاجه زى كده فيها جدال ماينفعش اللى بتعملوه ده حرام والله حرام
مسكت ايديه وجيت اخرج بره الاوضه وانا بتكلم
طب...طب بص تعالى ننزل لو مش مصدقنى نسأل الشيخ اللى تحب تسأله عشان تصدقنى يا بابا ده لو طفل صغير هيفهم ان ده حرام
هتتجوزيه يا مرام هتتجوزيه ورجلك فوق رقبتك انتى بنتى وانا حر فى القرار اللى اخده
بقيت مقيده ومفيش مخرج ولا مفر حتى الاوضه بتاعتى مفيهاش ولا بلكونه ولا شباك يعنى مش هعرف اكلم حد ولا انقذ نفسى فضلت كل يوم فى الاسبوع اللى عدى عليا اتعامل كحيوانه فعلا انا مش عارفه ولا فاهمه احمد ازاى يفكر كده يعنى ايشمعنى انا ليه انا ليه
اجهزى يلا المأذون جاى
ايه ده الاسبوع خلص مستحيل مستحيل اوافق لازم اتصرف
متنحه كده ليه بقولك المأذون جاى يلا اخلصى
مسكت فى ايديه بعياط
يا بابا يا بابا بالله عليك والله العظيم هعمل اى حاجه اى حاجه انت عايزها بس بلاش اتجوزه يا بابا بلاش وحياتى عندك يا بابا بص لو عايز فلوس هروح اشتغل واعمل كل اللى اقدر عليه واجيبلك فلوس ان شاالله حتى اشتغل فى بيوت الناس هعمل اى حاجه بس بالله عليك ماتعمل كده
بدون اى رد لقيته ضربنى بالقلم وقالى باسلوب استفزازى كإنى عبد عنده
اخلصى تلبسى وتجهزى والا مش هيحصل كويس فاهمه
سابنى وخرج وانا لحد دلوقتي مش عارفه هعمل ايه بس قلت خلاص اكيد المأذون لو عرف مش هيوافق على حاجه زى كده ومش بعيد لو لقاهم مصممين يبلغ البوليس ايوه هعمل كده هقوله لما اخرج عشان كتب الكتاب
لبست وقلت انى هقوله او لو ماعرفتش هحاول اتصرف بس مستحيل اسيبهم يعملوا كده
اتفضل يا شيخنا يلا يا احمد اقعد
يلا ياعمى
لسه جايه اخرج من الاوضه لقيت بابا قام من مكانه
خليكى
