جميلة جعلتني عاشق لإسراء إبراهيم

مختلفة تماما عن الاول بس احلي طبعا واجمل بالنسبالها لانها اكتشفت حجات عن فريد يمكن اول مرة تعرفها شافت حنيته عليها ومعاملته اللي اتغيرت تماما ده غير اهتمامه بيها وبكل تفاصيلها بقي يتكلم معاها ويحكيلها عن نفسه وشغله وحياته الا مسك مجبش سيرتها ابدا معاها وهي كمان حكتله كل حاجة عنها وتعمدت تعرفه ان شريف بالنسبالها اخوها وبس وانهم مش قريبين من بعض لانها دايما بتحس انهم مختلفين مش شبه بعض وان هو رافض وجودها في حياته بس دي الحقيقة وانه دايما مهتم بيها هي ومامتها وعلطول بيشوف طلباتهم وياما اتحايل علي امها عشان تعيش معاه في ڤيلته بس امها كانت بترفض كانت واقفة في المطبخ بتعمل الغدا زي ما اتعودت من يوم ما فريد عجبه اكلها وطلب انه ياكل من ايديها دايما فكانت واقفة هي ومنة اللي كانت بتساعدها بس منة كانت قلقانة ومتوترة وجميلة لاحظت ده فسألتها باستغراب    هو انا ليه حاسة انك قلقانة من حاجة يا منة هو في حاجة 
اتوترت منة اكتر وردت بتردد وهي بتبص لجميلة بأسف   انا كنت عايزة اعرف انتي لسة زعلانة مني من وقت اللي حصل ولا انا بجد حبيتك اوي ومكنتش عايزة يحصل اي حاجة من اللي حصلت دي
ابتسمت جميلة وردت بهدوء وهي بتبص لمنة بحب   لا يا منة خلاص اللي حصل حصل
كانت واقفة جميلة قدام المراية وبتبص علي نفسها بعد ما لبست الفستان اللي جابهولها فريد وكان شكلها جميل اوي اللون الازرق مع بشړة جميلة اللي ناعمة زي الاطفال وحجابها الابيض كانت قمر اوي لدرجة ان فريد وقف مكانه پصدمة اول ما خرج من الحمام وشافها كان مبهور برقتها وجمالها لدرجة انه كان عايز يقرب منها ويخبيها بين ضلوعه وميخليش حد يشوفها غيره ابتسمت جميلة بخجل وهي بصاله ودورت عنيها بعيد عنه وهي بتفرك في ايديها بتوتر وضربات قلبها ذادت لما لقته بيقرب منها لحد ما وقف قدامها فرفعت عنيها وبصتله وشافت ابتسامته الجذابة علي وشه وهو بيقولها بتلقائية   انتي اجمل بنت شافتها عيوني يا جميلة وصدقيني عمري ما كنت اتخيل اني ممكن اقول كدة لحد تاني غيرها
ابتسامة جميلة بهتت اول ما سمعت اخر كلمة من جملته وكأن عقلها بيستوعب اللي قاله فريد غيرها !! هو للدرجادي بيحبها لدرجة انه حتي بعد ما بقت لغيره لسة بيفكر فيها كانت بتسأل جميلة نفسها وهي حزينه ومکسورة من جواها بسبب جملته كلمة منه قلبت كيانها وخلت الغيرة تنهش قلبها ووقتها اعترفت لنفسها انها حبته ايوة حبت فريد للأسف ووقعت اسيرة لحب محكوم عليه بالفشل لانه مش هيفكر ولا هيشوف غيرها مهما حصل لاحظ فريد تغيير جميلة فانتبه للي قاله واتوتر وحاول يغير الموضوع فقالها بابتسامة    انا بقول نغير الفستان ده عشان مخليكي حلوة اوي
ابتسمت جميلة بمجاملة وبهتان وحاولت تمنع دموعها ولفت وشها وهي بتقوله بصوت مخڼوق   فريد هو انا ممكن اسأل سؤال وتجاوبني بصراحة 
غمض فريد عنيه بضيق من نفسه لانه لاحظ صوتها المخڼوق ودموعها اللي رافضة تنزل قدامه وقالها بتنهيدة    طبعا يا جميلة اسألي زي ما انتي عايزة
رجعت بصت جميلة في عيونه وسألته بحزن    ممكن اعرف قصة البنت اللي بتحبها 
قلب فريد عنيه بحيرة وهو مش عارف يقول ايه هو كان متأكد انها هتسأله عنها بعد الكلام اللي قالهولها دلوقتي فرجع بصلها وقالها بتنهيدة   مسك اسمها مسك وتبقي بنت عمتي يا جميلة ربتها علي ايدي