حب إجباري لزهرة الربيع

انتي تعرفيني منين علشان تحبيني انتي بس سمعتي عني شويه وده مجرد اعجاب
نغم اتنهدت وقالت بابتسامه_ في يوم اخدت بابا الله يرحمه على المستشفى كان تعبان جدا ورفضو يستقبلوه كانت مستشفى خصوصي وكانو عايزين مقدم والمبلغ مكانش معايا وكنت ببكي جامد واترجاهم وبعد ما فقدت الأمل ربنا بعتلي شاب يجنن اول ما دخل وقع قلبي في رجليا سأل فيه ايه والممرضات حكولو فقالهم دخلوهم وابعتولهم احسن دكتور والحساب مدفوع عرفت وقتها انه شريك في المستشفى وفعلا دخلنا واهتمو بينا كانو كل اللي يجي يغلط معانا يحذره ويقوله جمله مش هنساها دول محدش له دعوه بيهم دول تبع دكتور ريان الشافعي
ريان كان بيسمعها بدهشه وابتدي يفتكر الموقف ده فعلا حصل وقتها صعب عليه حالتها هيه وابوها ودخلهم مجانا
ونغم كملت وقالت_ انا اول مره يومها احس ان ليا ضهر في الدنيا من بعدها دورت عليك كتير علشان اشكرك وامنت الفلوس او جزء منها بالعافيه علشان اردهملك بس كنت مشغول جدا ومكنتش اعرف اوصلك مشيت وراك في كل مكان بقيت اجمع صورك من الجرايد وعلى التليفون انا مش بحبك لانك وقفت جمبي وقتها لا بس لانك دخلت قلبي وقتها لحد ما جتلك العياده وانت بقى اللي نرفزتني لما رفضتني من غير ما تسمعني وافتكرتني مجنونه كمان
ريان ضحك وقال_ لا وانتي ست العاقلين الصراحه نغم انا انا بجد مقدر شعورك بس سامحيني مش هينفع لو فعلا عايزه ترديلي الجميل طلعيني من الورطه دي لو سمحتي لو بتحبيني فعلا
نغم نزلت دموعها وقالت ببكا وعصبيه_
مش هقدر مس هقدر انا بقالي ٣ سنين عايشه على حلم واحد اني اكون معاك انا بالنسبالي قعدتنا سوا في البيت ده تسوى الدنيا صدقني 
ريان اتنهد وقال_ بالعافيه يعني يا نغم
نغم قالت بسرعه وحماس_ لا مش بالعافيه اديني بس فرصه وانا هخليك تحبني وتعشقني كمان
ريان ضحك وقال_ والله انتي مجنونه بجد طيب ولو انا برضو قولالك اني مش قادر احبك هتروحي تسحبي البلاع
نغم قالت_ ماشي لو محبتنيش هروح اسحبو
ريان لسه هيرد شاف في ايدها تليفون صغير قال_ ايه ده هو هو انتي معاكي تليفون
نغم قالت_ ده واحد قديم عند حمو قولتلو يجبهولي علشان لو حبيت اتصل بيه
ريان اخده منها بسرعه كانت تليفون صغير جدا بصله بسخريه وقال_ متاكده ان ده بيعرف يتصل
نغم قالت_ لا لسه بنعلمو طبعا بيتصل هو فيه ايه
ريان طلب شخص بسرعه واول ما رد قال_ الو ايوه يا هايدي انا ريان
نغم اضايقت جدا لما عرفت انه بيكلم خطيبته وريان قال _ است استني بس اهدي واسمعيني.
وسمعها سويه وقال_ والله حقك وعارف اللي انتي فيه بس اديني فرصه اشرحلك اللي حصل
وسمعها شويه تاني وقال _ طيب يا حبيبتي بس خليني افهمك و
بس قطع كلامه لما قفلت في وشه قال_ الو الو هايدي 
وبص لنغم بحرج وقال_ الشبكه وحشه شكله الاتصال اتقطع
نغم ابتسمت بسخريه وقالت_ اممم قفلت في وشك مش كده تستاهل اصلا رجاله بتحبو التهزيئ
ريان قال بغضب_ وهو التهزئ ده مين جابه غير حضرتك خلتيني اسمع كلام عمري ما اتخيلت اسمعه في الاحلام حتى
نغم ضحكت وقالت_ ليه قالتلك ايه
ريان قال بحزن_ قالتلي اللي قالته خلاص بقى اتمنى تكوني مبسوطة
نغم ضحكت وقالت_ جدا والمفروض انت كمان تنبسط ان ربنا كشفهالك قبل فوات الاوان
ريان بصلها بضيق وقال_ كشفهالي ايه حقها تقول كده بعد اللي سمعته وقرأته
نغم قالت_ لا مش حقها انا لو مكانها كنت هسمعك