رائعة منال جميعي الجزء السابع

عارف أنا اتصلت بيك يومها ليه رغم المشاكل للي كانت بينا 
فؤاد بتساؤل..ليه يا يمنى 
يمنى بجدية..عشان لسه فاكرة كلمة بابا الله يرحمه وهو بيقول فؤاد أخوكم طيب وقلبه ابيض بس ظروفه هي اللي كانت غلط
قبل يحيى رأس شقيقه قائلا..حقك عليا انت كمان عشان مديت إيدي عليك
عقد عماد ذراعيه أمام صدره قائلا..بقولكم إيه انتو فاكرين نفسكوا فاستوديو مصر احنا هنا فالنيابة يا حضرات وبعدين العسكري الغلبان ده هيفضل مستنيكوا كده كتير ولا إيه ولا انتوا بتستغلوا إن الراجل موصي عليكم وبتاخدوا راحتكم
فؤاد..راجل مين ده 
هم عماد أن يجيبه ولكن مرور عمرو بجوارهم استوقفه القي عليهم نظرة أخيرة قبل أن يغادر مسرعا
فؤاد بإنفعال..وده إيه اللي جايبه هنا ده كمان 
عماد..هو من حقه يحضر التحقيق بصفته مدعي بالحق المدنى واكيد طبعا هو عايز يحضر عشان يفهم الموضوع بالظبط مش يلا بينا بقى يا يمنى
يمنى..ماشي يا عماد
فؤاد..يلا ادخلي وانا ويحيى هنستناكي هنا يلا ربنا معاكي
في غرفة ياسين جلست منى أمام المكتب فيما جلس عمرو في ناحية وفي الناحية المقابلة جلست يمنى بصحبة عماد دون أن تحيد ببصرها نحو الجهة التي يجلس بها بينما كان هو يتطلع إليها في ندم شديد لتبدأ التحقيقات مع منى التي كان يبدو عليها التوتر والإرتباك
ياسين..ها يا مدام منى هتجيبي من الآخر وتقوليلنا الحقيقة ولا هتلفي وتدوري وتحوري وتتعبينا معاكي  
أجابته بشفاه مرتعشة قائلة..هو أنا متهمة بحاجة ولا إيه
أجابها قائلا بتهكم..لا سمح الله حد قال كده أنا بس بطمن ولازم تكوني فاهمة ان شهادتك دي هيتوقف عليها حياة إنسانة
منى..لا اطمن حضرتك أنا ناوية أقول كل اللي اعرفه عشان تقدروا تعرفوا مين اللي عمل كده وكمان عشان لو المدام بريئة متروحش بذنب غيرها وبعدين اللي كنت ممكن أخاف عليها خلاص راحت يعني خلاص مبقتش تفرق
تنهد ياسين قائلا..كويس أوي دلوقتي مدام يمنى قالت فأقوالها انها سمعتك انتي والمجني عليها وانتو بتتكلموا عن ان المجني عليها كانت حامل من شخص معين وانتي كنتي بتسأليها إذا كانت قالتله ولا لأ والكلام ده كان قبل جوازها من دكتور عمرو حصل ولا محصلش 
كان عمرو يتطلع إليها في إهتمام منتظرا إجابتها استدارت لتنظر إليه ثم عاودت النظر أمامها دون أن تجيبه
صړخ فيها ياسين قائلا..ما تردي
اجابت قائلة بتلعثم..أيوه حصل
ياسين..كويس أوي اتفضلي بقى احكيلنا الحكاية بالتفصيل من الأول
ازدردت منى لعابها وقالت بخفوت..مشيرة قبل ما تتطلق من محسن جوزها الأولاني بحوالي ست شهور اتعرفت على واحد اسمه هاني واستمرت علاقتهم فترة طويلة حوالي تلت سنين هو كان وعدها بالجواز لكن فضل يماطل معاها ويقولها لما تطلق من جوزها وبعد ما اطلقت فضل برضه يماطل ويقولها ماما رافضة جوازي من واحدة مطلقة واكبر مني وفالآخر سابها لكن مشيرة طلعت حامل ولما اتصلت بيه عشان تبلغه قالها 
عند هذا الحد توقفت منى عن السرد وحولت بصرها ناحية عمرو الذي كان يستمع إليها في ترقب وقد خلا وجهه من أي تعبيرات وكأنه قد هيأ نفسه لأسوأ ما يمكنه أن يسمع حثها ياسين على متابعة كلامها قائلا..سكتي ليه ما تكملي
خفضت رأسها وهي تكمل قائلة..قالها الكلام اللي المدام سمعته
ياسين..اللي هو إيه بقى  
منى..قالها نزليه أو 
صمتت للحظات قبل أن تكمل كلامها قائلة بسرعة وكأنها تلقي حملا ثقيلا عن كاهلها..أو شوفيلك واحد مغفل اتجوزيه واكتبيه بإسمه
شعر بالهواء ينسحب فجأة من رئتيه وجبينه يتصبب عرقا خفض بصره أرضا وبدا وكأنه يحدث نفسه وهو يتمتم بهمس قائلا..وطبعا ملقتش مغفل أحسن مني
رمقته بنظرة مشفقة ثم حولت بصرها عنه بسرعة قبل أن يلاحظها لم تكن وحدها من شعرت بالشفقة من أجله فلم يكن حال ياسين وعماد يختلف عنها كثيرا وكأن ثلاثتهم يشعرون بالأسى من أجل معلمهم السابق ومن كانوا يعتبرونه في يوم من الأيام مثلا أعلى
ياسين..ها وبعدين إيه اللي حصل بعد كده 
منى..بعدها مشيرة عرفت ان دكتور عمرو بيدور على عروسة فحطت نفسها فطريقه عشان يتجوزها لأنها كانت حاطة عينها عليه من زمان من أيام ما كانت بتروحله المكتب عشان يرفعلها قضية طلاق على جوزها وفعلا قدرت تتجوزه عندما وصلت إلى هذه العبارة استوقفها عمرو قائلا..استني عندك يعني